Víða rigning en slydda og snjó­koma fyrir norðan

Veðurstofan spáir suðlægri átt, þrír til tíu metrar á sekúndur í dag, en á Vestjförðum má reikna með að allhvöss norðaustanátt verði ríkjandi. Spáð er rigningu eða súld með köflum en slyddu eða snjókomu fyrir norðan.

Í hugleiðingum veðurfræðings segir að hiti verði í kringum frostmark norðantil á landinu, en allt að sjö stiga hiti sunnanlands.

„Norðaustan strekkingur á morgun. Lítilsháttar él fyrir norðan en annars þurrt að kalla. Vaxandi suðaustan átt á Suður- og Vesturlandi og rigning eða súld með köflum eftir hádegi en léttir til norðaustantil. Hiti 1 til 5 stig sunnan heiða, en vægt frost fyrir norðan og austan.“

Veðurhorfur á landinu næstu daga

Á miðvikudag: Austlæg átt 3-10 m/s. Lítilsháttar él á austanverðu landinu, en þurrt að kalla annars staðar. Hiti 1 til 5 stig sunnan heiða, en vægt frost fyrir norðan og austan. Suðlægari undir kvöld og dálítil rigning, en styttir þá upp norðaustantil.

Á fimmtudag: Suðlæg átt 3-10 og allvíða dálítil væta. Norðaustan strekkingur síðdegis á Vestfjörðum og Norðurlandi með slyddu eða snjókomu. Hiti allt að 6 stigum með suðurströndinni, en kringum frostmark fyrir norðan.

Á föstudag: Norðaustlæg átt 8-15 m/s. Rigning eða slydda á sunnanverðu landinu og hiti 1 til 5 stig, en víða snjókoma í öðrum landshlutum og vægt frost.

Á laugardag og sunnudag: Breytileg átt og væta á sunnanverðu landinu með hita að 6 stigum, en slydda eða snjókoma norðantil með hita um og undir frostmarki.

Á mánudag: Útlit fyrir norðaustlæga átt og lítilsháttar snjókomu eða slyddu sunnan- og vestantil en annars þurrt að kalla. Frost 0 til 6 stig en frostlaust við suðurströndina.