Bjart veður og kalt en hvessir annað kvöld

Gert er ráð fyrir að frost verði víða á bilinu þrjú til tólf stig þar sem kaldast verður í innsveitum á Norður- og Austurlandi.

„Sunnan og suðvestan strekkingur á morgun, en hvassviðri norðvestantil annað kvöld. Þurrt á Norðaustur- og Austurlandi, annars súld eða rigning, einkum vestanlands. Hlýnandi, hiti víða á bilinu 5 til 10 stig síðdegis.

Hvöss suðvestanátt og úrkomusamt á föstudag, en þurrt að kalla austanlands. Kólnandi veður,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Sunnan og suðvestan 8-15 m/s. Rigning með köflum, einkum V-lands, en þurrt á NA- og A-landi. Hlýnandi veður, hiti 3 til 10 stig síðdegis.

Á föstudag: Hvöss suðvestanátt og rigning, en þurrt að kalla NA-lands. Hiti 5 til 10 stig. Él S- og V-til eftir hádegi og kólnar, en slydda eða rigning þar um kvöldið.

Á laugardag: Suðvestanátt og rigning, en slydda eða snjókoma V-lands. Hiti 0 til 8 stig, hlýjast austast.

Á sunnudag: Suðvestanátt og él, en bjartviðri A-lands. Frost 0 til 7 stig.

Á mánudag: Suðlæg átt og dálítil él V-til, frost 0 til 8 stig. Rigning eða snjókoma S- og V-lands um kvöldið og hlýnar í veðri.

Á þriðjudag: Suðvestanátt með rigningu eða slyddu og síðar skúrum eða éljum, en úrkomulítið NA-lands.