Steypustöðin verður græn

„Þetta er lokahnykkurinn á sameiningarferli Steypustöðvarinnar og dótturfélaga þess sem hófst fyrir um tveimur árum. Við höfum nýtt þann tíma vel í að straumlínulaga starfsemina, þétta framboð félagsins á byggingarlausnum og sækjum nú sterkari fram sem ein heild,“ segir Björn Ingi Victorsson forstjóri Steypustöðvarinnar en Steypustöðin hefur sameinað vörumerkin Loftorku Borgarnesi og Hólaskarð undir nafninu Steypustöðin. Við sameininguna fær félagið nýtt og uppfært útlit sem endurspeglar hlutverk þess og stefnu.

„Nýtt útlit og vörumerki endurspeglar fjölbreyttara framboð félagsins á byggingarlausnum og skarpari áherslur í þjónustu við byggingariðnaðinn og sameinar alla starfsmenn undir eitt sterkara vörumerki. Við teljum mikil sóknartækifæri fólgin í því að sameina heildarstarfsemi félagsins. Í þessu felst skilvirkara sölu og markaðsstarf og aukið hagræði í rekstri,“ segir Björn Ingi.

Lausnaframboð Steypustöðvarinnar mun ná til víðtækari sviða í byggingaframkvæmdum allt frá framleiðslu og dreifingu á blautsteypu, framleiðslu á forsteyptum einingum og hellum, múrvörum og fylliefnum til framkvæmda. Auk þess mun félagið leggja enn frekari áherslu á endurvinnslu á steypu og malbiki.

„Við ætlum okkur að vera skrefi á undan á byggingamarkaðnum og bjóða viðskiptavinum okkar sterkari þjónustu og ráðgjöf á þeim lausnum sem við höfum upp á að bjóða. Þetta þýðir aukin breidd í starfseminni, nýsköpun, betri og heildstæðari þjónusta. 

Við erum nú vel í stakk búin til að þjónusta viðskiptavini okkar ennþá betur með víðtækari og spennandi lausnum sem hafa ekki verið til staðar á markaðnum. Það eru svo sannarlega spennandi tímar framundan.“

Hjá Steypustöðinni starfa um 300 starfsmenn á um 10 starfsstöðvum í Reykjavík, Hafnarfirði, Reykjanesi, Borgarnesi, Selfossi og Vík með framleiðslugetu á um 600 rúmmetrum af Steypu á klukkustund. Velta ársins 2020 voru tæpir 8 milljarðar. Steypustöðin var stofnuð árið 1947 og var frumkvöðull í Evrópu með dreifingu á blautsteypu úr steypubifreiðum og varðaði þannig brautina í mannvirkjagerð á Íslandi. Loftorka var stofnuð árið 1962 og malarnámur Hólaskarðs og Vatnsskarðs eiga rætur að rekja til 9. áratugs síðustu aldar.