„Skoski Kanté“ sendi SMS á mömmu og pabba fyrir leik og var bestur á Wembley

Ekki er víst að Gilmour hefði einu sinni verið valinn í landsliðshópinn hefði ekki verið fyrir meiðsli þeirra Ryans Jack og Kenny McLean í aðdraganda mótsins. Gilmour hafði aldrei byrjað landsleik fyrir Skota fyrir gærkvöldið og óhætt er að segja að hann hafi nýtt tækifærið vel.

Sendingageta Gilmours, róleiki hans á boltanum, og almenn þrautseigja voru fagnaðarefni skoskra stuðningsmanna sem klöppuðu vel fyrri stráknum þegar honum var skipt á velli um stundarfjórðungi fyrir leikslok í gær.

Landi Gilmours, Graeme Souness, sem stýrði miðjunni hjá raðmeistaraliði Liverpool á árum áður, sagði hann hafa verið besta manninn á vellinum í gær. Margur var sammála því þar sem Gilmour fékk verðlaun sem maður leiksins í leikslok.

Getur spilað eins og hann vill fyrir Skotland

„Guð minn góður... á meðal þeirra betri.“ sagði Andrew Robertson, fyrirliði Skota, um Gilmour eftir leik.

„Ekkert slær hann út af laginu. Hann getur spilað eins marga leiki og hann vill fyrir Skotland.“ bætti hann við.

„Við vissum áður en við settum hann inn í liðið að hann kann leikinn, þetta er bara spurning um rétta augnablikið. Í kvöld var hans augnablik sem hann nýtti sér og það kom engum á óvart,“ sagði Steve Clarke, þjálfari Skota, um frammistöðu Gilmours.

Patrick van Aanholt, leikmaður Crystal Palace sem leikur fyrir hollenska landsliðið á EM, sagði Gilmour í raun vera eins og Frakkinn N'Golo Kanté, sem er samherji Gilmours hjá Chelsea og af mörgum talinn besti varnartengiliður fótboltans í dag.

Sendi SMS á mömmu og pabba

Sjálfur þakkar Gilmour liðsfélögum sínum fyrir góða frammistöðu og segist hafa sent foreldrum sínum SMS-skilaboð fyrir leik.

„Mér datt í hug að ég myndi byrja eftir æfingarnar en var ekki sagt það fyrr en á síðasta liðsfundinum áður en við fórum á völlinn, svo ég sendi mömmu og pabba SMS í rútunni. Ég er virkilega stoltur að byrja og að koma hér og gera vel er enn betra.“

„Þetta var frábær frammistaða hjá liðinu og allir gerðu það sem þeir þurftu að gera,“ sagði Gilmour eftir leik.

Skotar eru eftir leik gærkvöldsins með eitt stig, líkt og Króatía, eftir fyrstu tvo leikina. Liðin mætast innbyrðis í lokaumferðinni í leik sem mun líklega ráða því hvort liðanna fer áfram í 16-liða úrslit.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.