Mjög góð bleikjuveiði í Ásgarði

Karl Lúðvíksson skrifar 9. júní 2021 09:04

Bleikjan hefur verið á undanhaldi í Soginu en það er von um að það gæti breyst. Mynd: Ríkarður Hjálmarsson

Ásgarður við Sogið hefur verið að eiga góða daga í bleikju upp á síðkastið en það er ljóst að góður árangur Veitt og Sleppt er að skipta þarna miklu máli.

Bleikjan við Ásgarð verður bara vænni með tímanum og 50-60 sm bleikjur á þessu svæði þykir engin stórfrétt. Síðustu tvo daga hefur veiðin verið góð en samkvæmt okkar heimildum var um 50 bleikjum landað á þessum tveimur dögum. Mest af bleikjunni heldur sig á svæðinu við Símastreng en á svæðinu fyrir neðan veiðihús á stöðum eins og Frúarstein og Gíbraltar má líka finna vænar bleikjur.

Sogið var komið á mjög vondan stað, það er nokkuð ljóst enda fór bleikju fækkandi og laxveiðin hefur ekki verið sérstök undanfarin ár. Ofveiði á bleikju er líklega um að kenna en þeir sem þekkja Sogið vel hafa lengi haft orð á því að það sé greinileg hnignun í stofnstærð bleikjunnar í ánni. Nú hafa nýjir aðilar tekið við Bíldsfelli og líklegur tónn þar verður að öllum líkindum sá sami og er við Ásgarð að Veitt og Sleppt verði viðhaldið á meðan Sogið nær aftur vopnum sínum.

Stangveiði