Myndband: Porsche Taycan keyrir utan í einn bíl og ofan á annan

Myndband af ökumanni Porsche Taycan bifreiðar sem reynir að leggja í brattri innkeyrslu hefur vakið mikla athygli á internetinu. Ökumaðurinn virðist hafa ruglast á inngjöf og bremsu.

Bíll eins og Taycan sem skilar aflinu nánast rakleiðis í malbikið er fljótari að valda skaða og tjónið verður oft meira þegar óhöpp verða, þar sem ökumaður ruglast á inngjöf og bremsum. Bíllinn er yfirleitt kominn fyrr á meiri ferð.

Umrætt myndband sýnir Taycan bifreið koma að húsi og nema staðar í innkeyrslunni. Nánast um leið og bíllinn stöðvast rýkur hann af stað og lendir á einum bíl, sem virðist vera Renault Scenic og lendir svo ofan á BMW 1, bláum að lit, eftir að hafa farið fram af vegg.