Hvasst og rigning vestantil en bjart fyrir norðan og austan

Yfir Færeyjum er nú sterk hæð sem heldur lægð fyrir vestan land. Af þeim sökum er hvassara og rigning um vestanvert landið en suðlægar áttir og bjartviðri fyrir norðan og austan, að því er segir í hugleiðingum veðurfræðings á Veðurstofu Íslands.

Veðrið yfir Vesturlandinu gengur að mestu niður í dag eða í nótt þegar hæðin stækkar og teygir sig vestar.

Á fimmtudaginn er svo útlit fyrir hæga breytilega átt og bjart veður á mest öllu landinu.

Veðurhorfur á landinu:

Suðaustan 10-15 m/s og rigning um vestanvert landið, en sunnan 5-10 og bjartviðri norðan- og austanlands.

Suðlæg eða breytileg átt 3-8 m/s og bjart að mestu á morgun, en suðaustan 8-13 suðvestantil og lítilsháttar rigning fram eftir degi.

Hiti 4 til 10 stig að deginum.

Á fimmtudag:

Suðlæg eða breytileg átt 3-8 m/s og bjart að mestu, en suðaustan 8-13 suðvestanlands og lítilsháttar rigning fram eftir degi. Hiti 4 til 9 stig.

Á föstudag:

Hæg breytileg átt, bjartviðri og hiti 3 til 8 stig.

Á laugardag:

Fremur hæg breytileg átt og bjart að mestu sunnanlands, en skýjað og lítilsháttar slydda eða snjókoma norðan heiða. Fer að rigna vestantil seint um kvöldið. Kólnar í veðri.

Á sunnudag:

Austlæg eða norðaustlæg átt og rigning eða slydda, en snjókoma norðan- og norðaustanlands. Hiti um og yfir frostmarki.