Sænska pressan um Svein­dísi og Karó­línu: „Leggið þessi tvö nöfn á minnið“

Það voru ekki bara íslenskt knattspyrnuáhugafólk sem var hrifið af frammistöðu íslenska kvennalandsliðsins í gær því það gerðu einnig sænskir miðlar.

Ísland og Svíþjóð skildu jöfn, 1-1, er liðin mættust á Laugardalsvelli. Gestirnir komust yfir í fyrri hálfleik en markamaskínan Elín Metta Jensen jafnaði metin í síðari hálfleik.

„Það var ljóst snemma að það voru tvö bestu liðin í riðlinum sem voru að mætast í kuldanum á Laugardalsvelli. Ísland veitti mótspyrnu á allt öðru stigi en önnur lið í riðlinum hafa sýnt til þessa,“ sagði í umfjöllun Vårnamo Nyheter.

Þar var sérstök áhersla lögð á frammistöðu vængmanna íslenska liðsins.

„Íslenska liðið mætti af krafti í öll návígi og tveir nítján ára leikmenn í íslenska liðinu, Sveindís Jane Jónsdóttir og Karólína Lea Vilhjálmsdóttir ollu sænsku vörninni oft á tíðum í vandræðum í upphafi leiks. Þið skuluð leggja þessi tvö nöfn á minnið.“

Ósammála dómaranum eins og Íslendingar

Íslenska liðið var ansi ósátt með að markið sem Sara Björk Gunnarsdóttir skoraði í fyrri hálfleik var dæmt af og sænski fjölmiðillinn var á sama máli.

„Eftir að hafa horft á endursýninguna var hægt að skilja pirring íslensku leikmannanna. Snertingin frá Glódísi Perlu var ekki mikil áður en Lyon-stjarnan Sara Björk Gunnarsdóttir setti boltann í netið.“

„Ísland fékk fleiri tækifæri. Næst komust þær á 77. mínútu þegar það var heppni frekar en eitthvað annað sem kom í veg fyrir íslenskt mark. Ísland skaut tvisvar í þverslána, fyrst beint úr horni og síðan þegar Elín Metta Jensen skaut frákastinu einnig í þverslána.“

„Sænska liðið komst í gegnum storminn og varð að sætta sig við eitt stig,“ sagði að lokum í greininni sem má lesa hér.