Pogba með kórónuveiruna

Paul Pogba, leikmaður Manchester United og franska landsliðsins, hefur greinst með kórónuveiruna.

Pogba var ekki valinn í franska landsliðið fyrir leikina gegn Svíþjóð og Króatíu í Þjóðadeildinni. Didier Deschamps, þjálfari Frakklands, sagði að Pogba væri með kórónuveiruna. Sömu sögu er að segja af Tanguy Ndombele, leikmanni Tottenham.

Fjórir nýliðar eru í franska hópnum: Eduardo Camavinga, Dayot Upamecano, Houssem Aourar og Mike Maignan.

Frakkar mæta Svíum í Solna laugardaginn 5. september og Króötum í París þremur dögum síðar. Auk þeirra eru Portúgalir í riðli 3 í A-deild Þjóðadeildarinnar.

Pogba hefur leikið 69 leiki fyrir franska landsliðið og skorað tíu mörk. Eitt þeirra kom gegn Íslandi í átta liða úrslitum á EM 2016.