Guðni Bergsson, núverandi formaður KSÍ, var fyrirliði íslenska landsliðsins, þegar Rúmenar mættu síðast í Laugardalinn fyrir að verða 24 árum síðan.
Eftir 22 daga tekur Ísland á móti Rúmeníu á Laugardalsvellinum í undanúrslitaleik í umspili um laust sæti á EM 2020 og sigurvegarinn kemst í hreinan úrslitaleik um sæti á EM. Vísir telur niður í leikinn með því að skoða betur þennan stærsta heimaleik í sögu íslenska landsliðsins eða líta til baka á söguleg tengsl þjóðanna á knattspyrnuvellinum.
A-landslið Rúmena lék síðast á Laugardalsvelli 9. október 1996 eða fyrir 23 árum og fimm mánuðum síðan.
Rúmenska liðið var geysiöflugt á þessum tíma með menn eins og Gheorghe Hagi, Gheorghe Popescu, Dorinel Munteanu og Dan Petrescu í fararbroddi. Aðeins tveimur árum fyrr hafði liðið slegið í gegn á HM í Bandaríkjunum 1994 og fyrr um sumarið tók liðið þátt í úrslitakeppni Evrópumótsins í Englandi
Rúmenar sýndu styrk sinn í leiknum í Laugardalnum og unnu hann 4-0. Formaður Knattspyrnusambands Íslands í dag var þarna í miðri íslensku vörninni og á ekki góðar minningar frá þessum leik.
Guðni Bergsson kom þeim óvart sjálfur á bragðið með því að skora sjálfsmark á 21. mínútu. Athygli vekur þó að íslensku fjölmiðlarnir neituðu að skrá þetta sem sjálfsmark á fyrirliðann.
Íslensku fjölmiðlamennirnir skráðu markið á Viorel Dinu Moldovan en það fer ekkert á milli mála á myndbandsupptökum frá leiknum að það var Guðni sem sendi þarna boltann í eigið mark.
Því hefur verið breytt á flestum stöðum sem segja frá úrslitum í þessari undankeppni en þó ekki öllum. Fyrsta íslenska heimildin um sjálfsmarkið er líklega í bók Sigmundar Ó. Steinarssonar „Saga landsliðs karla“ sem kom út árið 2014 en Sigmundur skráir markið þar sem sjálfsmark hjá Guðna Bergssyni.
Ísland og Rúmenía mætast í umspili um laust sæti á EM 2020 á Laugardalsvelli 26. mars. Leikurinn verður sýndur í beinni útsendingu á Stöð 2 Sport en sérstakur upphitunarþáttur fyrir leikinn verður á dagskrá 16. mars á Stöð 2 Sport.
22 dagar í Rúmeníuleikinn: Formaður KSÍ skoraði sjálfsmark síðast þegar Rúmenar komu í Laugardalinn

Tengdar fréttir

23 dagar í Rúmeníuleik: Ísland gæti endað í riðli með Englandi og Ítalíu í Þjóðadeildinni
Í dag verður dregið í riðla í Þjóðadeildinni þar sem íslenska karlalandsliðið er áfram í hópi A-þjóða eftir að fjölgað var í A-deildinni.

25 dagar í Rúmeníuleikinn: Mikill munur á meðalaldri og reynslu landsliða Íslands og Rúmeníu
Íslenska karlalandsliðið í fótbolta er að eldast og mætir í umspilinu fyrir EM 2020 liði sem er að fá mjög sterka unga og spennandi kynslóð upp í A-landsliðið sitt. Reynslan er því heldur betur í liði með íslenska liðinu.

27 dagar í Rúmeníuleikinn: Þegar rúmenska stórstjarnan varð undir í baráttunni við Eið Smára
Einn af eftirminnilegustu „sigrum“ Íslendinga á Rúmenum var þegar kom í baráttunni um sæti í framlínu Chelsea liðsins á fyrsta áratug aldarinnar. Eiður Smári Guðjohnsen hélt þá sinni stöðu þótt að Chelsea eyddi miklum pening í rúmenskan framherja sem átti að taka við af íslenska landsliðsmanninum.

29 dagar í Rúmeníuleikinn: Ársmiðahafarnir eru heppnustu menn dagsins
Miðasala á leik Íslands og Rúmeníu í umspili undankeppni EM 2020 hefst í dag en aðeins útvaldir mega þó kaupa miða á leikinn í dag.

28 dagar í Rúmeníuleikinn: Nýr þjálfari Rúmena er aðeins einu ári eldri en Kári Árna
Þjálfari Rúmena endaði sextán ára leikmannaferilinn sinn hjá liði þeirra Aron Einars Gunnarssonar og Heimis Hallgrímssonar í Katar. Ísland mætir rúmenska landsliðinu í umspili um sæti á EM 2020 eftir 28 daga.

26 dagar í Rúmeníuleikinn: Sagan segir að Laugardalsvöllur verði klár
Aðeins tvisvar á síðustu 20 árum hefur verið alhvít jörð í Laugardal þann 26. mars. Með það að leiðarljósi ætti leikur Íslands og Rúmeníu í umspili um sæti á EM 2020 ekki að vera í hættu en veðurguðirnir eru eins og við öll vitum óútreiknanlegir.

24 dagar í Rúmeníuleikinn: Gylfi hefur ekki skorað síðan að hann lék síðast með Íslandi fyrir 106 dögum
Gylfi Þór Sigurðsson var nálægt því að enda langa bið eftir marki á Goodison Park í ensku úrvalsdeildinni en boltinn vildi ekki inn. Síðasta mark Gylfa kom í leik með íslenska landsliðinu 17. nóvember síðastliðinn.