Uppgjör Henrys: Galdramaðurinn Gullmundur launaði Dönum lambið gráa

Guðmundur Þórður Guðmundsson skilaði Dönum Ólympíugulli en fékk aldrei þá virðingu sem hann átti skilið þar í landi. Danir læra kannski að bera almennilega virðingu fyrir manninum eftir leik kvöldsins sem Íslendingar unnu með glæsibrag, 31-30.

Guðmundur var kallaður Gullmundur í Danmörku eftir ÓL en var samt stanslaust talaður niður af fjölmiðlum. Samstarfsmenn komu ekki alltaf fram af virðingu og okkar maður var súr með viðskilnað sinn þar. Skiljanlega. Hann vill ekki segja það opinberlega en það er alveg klárt að þessi leikur í kvöld var persónulegur. Mjög persónulegur. Það sást á sprettinum í lok leiks og ég get varla ímyndað mér hversu sætt þetta var fyrir þennan stórkostlega þjálfara sem enn og aftur sannaði að hann er galdramaður.

Var með öll svörin

Þessi harðduglegi þjálfari þekkir Danina út og inn. Hann þekkir veikleika þeirra í bak og fyrir og nýtti sér það út í hið ítrasta. Hann átti svör við öllu og Danirnir vissu oft á tíðum ekki sitt rjúkandi ráð. Enda voru þeir komnir með sjö í sókn undir lokin en það dugði ekki til.

Það er eitt að teikna upp frábæra stríðsáætlun. Það er annað að fá leikmenn til þess að trúa á hana og framkvæma eins og strákarnir okkar gerðu svo stórkostlega í kvöld.

Trúin skein af hverju andliti og þegar það gaf á bátinn á erfiðum útivelli (eins og má svo sannarlega kalla Malmö Arena í kvöld) þá buguðust menn aldrei. Héldu sig við leikplanið og hlutina sem gengu vel. Það skilaði sér ríkulega.

Aron bestur í heimi



Við erum sem handboltaþjóð svo rík af því að eiga Aron Pálmarsson sem er á sínum degi besti handboltamaður heims. Frammistaða hans í kvöld var ómannleg. Hann skoraði 10 mörk og gaf 9 stoðsendingar. Fiskaði líka eitt víti. Þetta var heimsklassaframmistaða að öllu leyti því hann var einnig mjög öflugur í vörninni.

Allir strákarnir voru hetjur í kvöld. Það er ekki hægt að vinna besta lið heims án þess að allir séu frábærir. Það lögðu líka allir lóð á vogarskálarnar þó svo Aron hafi verið í sérklassa.

Vélmennið brotnar ekki

Hin 39 ára gamli Alexander Petersson ákvað að snúa aftur. Takk, Lexi. Ein besta ákvörðun sem þú hefur tekið. Vélmennið okkar skilaði heldur betur sínu á báðum endum. Mikilvæg mörk og frábær stopp í vörninni. Hann fékk svo krampa í báða fætur en snéri samt aftur út á völlinn því hann er jú vélmenni.

Margir voru ósáttir við að Kári Kristján væri kominn aftur á línuna en hann sannaði í kvöld að hann er besti sóknarlínumaðurinn okkar. Heimakletturinn okkar.

Hetjurnar okkar



Maðurinn sem eldist ekki, Guðjón Valur, var eins og alltaf að skila sínu. Elvar Örn býr yfir gríðarlegum andlegum styrk og ekki að sjá að þar fari lítt reyndur landsliðsmaður. Góður á báðum endum og hann og Ýmir voru ótrúlega sterkur í vörninni. Bjarki Már kom inn og kláraði mikilvæg víti, Bjöggi varði réttu boltana og Janus skilaði frábærum mínútum. Það voru allir að skila. Þetta er alvöru lið.

Svo lengi lærir sem lifir og Guðmundur mun örugglega rifja það upp fyrir næstu leiki að á síðustu Evrópumótum hefur liðið byrjað vel en runnið svo á rassgatið. Það má ekki gerast núna og ég neita að trúa því að það gerist. Það er of mikil reynsla og gæði í þessu liði.

Ógleymanlegt kvöld í alla staði í Malmö. Einn besti landsleikur sem íslenskt landslið hefur spilað frá upphafi. Það er einfaldlega þannig. Nú þarf að nýta meðbyrinn og halda áfram á þessari frábæru braut. Takk fyrir mig. Ég mun aldrei gleyma þessu kvöldi.