Liverpool skrifar undir samning við Nike en Klopp við erkifjendurna

Liverpool skrifaði á dögunum undir samning við íþróttafataframleiðandann Nike en nú virðist hins vegar stjóri félagsins vera búinn að skrifa undir auglýsingasamning við erkifjendurna.

Enskir fjölmiðlar greina frá því að Jurgen Klopp sé búinn að semja við Adidas og muni vera einungis einn af tveimur þjálfurunum sem eru samningsbundnir þeim.

Telegraph greinir frá þessu en það er einungis Jose Mourinho í ensku úrvalsdeildinni sem er einnig samningsbundinn fataframleiðanda. Mourinho er einnig samningsbundinn Nike.

Klopp hefur verið duglegur að auglýsa í heimalandinu en hann hefur verið andlit bjórsins, Erdinger, en þegar hann þjálfaði þar var hann einnig á auglýsingum súkkulaðiframleiðanda og bíla.

Það er spurning hvernig þessar fréttir fara í forráðamenn ensku meistaranna og forráðamenn Nike en samningur Nike við Liverpool er talinn hljóða upp á 70 milljónir punda á hverju ári.