Sveindís áritaði takkaskó eftir fyrstu þrennuna í efstu deild

Sveindís Jane Jónsdóttir skoraði sína fyrstu þrennu í efstu deild þegar Breiðablik rúllaði yfir Íslandsmeistara Vals, 4-0, á Kópavogsvelli í gær.

Sveindís, sem kom á láni til Breiðabliks frá Keflavík í vetur, hefur farið vel af stað í græna búningnum og skorað sex mörk í fyrstu fimm leikjum Blika í Pepsi Max-deildinni.

Með sigrinum í gær minnkaði Breiðablik forskot Vals á toppi deildarinnar niður í eitt stig. Blikar eiga auk þess tvo leiki til góða á Valskonur. Þessi lið voru í sérflokki á síðasta tímabili og flestir búast við því að baráttan um Íslandsmeistaratitilinn standi á milli þeirra tveggja.

Staðan í hálfleik í leiknum í gær var markalaus en byrjunin á seinni hálfleik var ótrúleg. Á 46. mínútu kom Sveindís Breiðabliki yfir eftir sendingu Öglu Maríu Albertsdóttur.

Valur tók miðju, tapaði boltanum og nokkrum sekúndum síðar skoraði Sveindís aftur, nú eftir stungusendingu Berglindar Bjargar Þorvaldsdóttur.

Sveindís skoraði sitt þriðja mark á 77. mínútu og tíu mínútum síðar gerði Berglind Björg fjórða mark Blika. Agla María lagði bæði mörkin upp og átti því stoðsendingaþrennu í leiknum.

Breiðablik hefur unnið alla fimm leiki sína í Pepsi Max-deildinni í sumar með markatölunni 19-0. Næsti leikur Blika er gegn nýliðum Þróttara á heimavelli á föstudaginn.

Sveindís var að vonum hin kátasta eftir leik og gaf sér tíma til að árita takkaskó fyrir unga Blika sem voru í stúkunni á Kópavogsvelli.

Hana vantar aðeins eitt mark til að jafna markafjölda sinn frá síðasta tímabili. Sveindís skoraði þá sjö mörk í sautján leikjum fyrir Keflavík sem féll. Hún hefur alls skorað þrettán mörk í 22 leikjum í efstu deild.

Hér fyrir neðan má sjá mörkin úr leiknum í gær, þegar Sveindís áritaði takkaskó fyrir unga iðkendur Breiðabliks og viðtal við hana.