Fimm Co­vid-sjúk­lingar fórust í bruna á sjúkra­húsi í Péturs­borg

Fimm sjúklingar smitaðir af kórónuveirunni létu lífið í Pétursborg í Rússlandi þegar eldur kom upp á gjörgæsludeildinni á sjúkrahúsi heilags Georgs þar sem fólkið lá, tengt við öndunarvélar.

Svo virðist sem skammhlaup í öndunarvél hafi orsakað brunann, en alls þurftu 150 manns að yfirgefa sjúkrahúsið vegna ástandsins að sögn yfirvalda. Búið var að slökkva eldinn eftir að hann hafði logað í um hálftíma.

Erlendir fjölmiðlar greina frá því að sakamálarannsókn er hafin á upptökum brunans.

Rússar standa í harðri baráttu við veiruna og nú er svo komið að landið er í fjórða sæti yfir fjölda smita, á eftir Bandaríkjunum, Spáni og Bretlandi. Alls hefur verið tilkynnt um 220 þúsund smit í Rússlandi og eru nú rúmlega tvö þúsund dauðsföll rakin til Covid-19.