Inter hafði betur í sjö marka leik

Inter Milan vann sigur á Sassuolo í sjö marka leik í ítölsku úrvalsdeildinni í fótbolta í dag.

Lautaro Martinez kom gestunum frá Inter yfir strax á annarri mínútu leiksins en Domenico Berardi jafnaði fyrir heimaenn á 16. mínútu.

Romelu Lukaku skoraði tvisvar áður en flautað var til hálfleiks, seinna markið úr vítaspyrnu á síðustu mínútu fyrri hálfleiks.

Inter fékk aðra vítaspyrnu í seinni hálfleik, Martinez fór á punktinn í það skiptið og skoraði. Inter því komið í góða stöðu með þriggja marka forskot.

Filip Djuricic gaf heimamönnum von um endurkomu á 74. mínútu og Jeremie Boga kom þeim nær á 82. mínútu. Leikmenn Sassuolo sóttu eins og þeir gátu undir lokin en ekki kom jöfnunarmarkið, lokastaðan 4-3 sigur Inter.