Barcelona vill fá Rapinoe

Barcelona hefur áhuga á að fá bandarísku landsliðskonuna Megan Rapinoe til liðsins.

Rapinoe, sem er 34 ára, hefur áhuga á að ljúka ferlinum í Evrópu. Hún hefur leikið með Seattle Reign síðan 2013.

„Við erum í aðstöðu til að fá leikmann í þessum gæðaflokki,“ sagði Maria Teixidor, stjórnandi hjá Barcelona, við Gol.

Barcelona byrjaði með kvennalið 2015. Liðið komst í úrslit Meistaradeildar Evrópu á síðasta tímabili en tapaði þar fyrir Lyon.

Barcelona er á toppi spænsku úrvalsdeildarinnar eftir þrjár umferðir. Á laugardaginn vann liðið meistara Atlético Madrid með sex mörkum gegn einu.

Rapinoe vakti mikla athygli á HM 2019 í sumar, jafnt innan vallar sem utan. Hún var valin besti leikmaður mótsins og var markahæst ásamt Alex Morgan og Ellen White.

Rapinoe skoraði fyrra mark Bandaríkjanna í 2-0 sigri á Hollandi í úrslitaleik HM.