Starf knattspyrnustjóra AC Milan hangir á bláþræði

Starf Marco Giampaolo, knattspyrnustjóra AC Milan, hangir á bláþræði eftir slaka byrjun liðsins á tímabilinu.

Milan tapaði fyrir Torino, 2-1, í gær. Liðið hefur tapað þremur af fyrstu fimm leikjum sínum í ítölsku úrvalsdeildinni og er í 13. sæti hennar. Milan hefur aðeins skorað þrjú mörk í deildinni, þar af tvö úr vítaspyrnum.

Ef Milan tapar fyrir Fiorentina á sunnudaginn gætu dagar Giampaolo hjá félaginu verið taldir.

Gennaro Gattuso, forveri Giampaolo í stjórastarfinu hjá Milan, hefur verið orðaður við sitt gamla félag. Gattuso hætti hjá Milan eftir síðasta tímabil. Liðið endaði þá í 5. sæti.

Claudio Ranieri og Luciano Spalletti hafa einnig verið orðaðir við Milan.