Pepsi Max-mörk kvenna: Ákall til stuðningsmanna KR

Sérfræðingar Pepsi Max-marka kvenna eiga von á spennandi bikarúrslitaleik þar sem Selfoss og KR mætast á Laugardalsvelli 17. ágúst næstkomandi.

Selfoss tryggði sér sæti í bikarúrslitum í þriðja sinn með sigri á Fylki, 0-1, í Árbænum. KR vann Þór/KA, 2-0, á Meistaravöllum. Þetta er í ellefta sinn sem KR kemst í bikarúrslit. KR-ingar hafa fjórum sinnum orðið bikarmeistarar.

„KR-liðið hefur verið á uppleið og þetta var frábær sigur hjá þeim,“ sagði Ásthildur Helgadóttir í Pepsi Max-mörkum kvenna í gær.

„Það er bullandi möguleiki fyrir bæði lið. Þau eiga eftir að spila þétt og fast. Það eru leikmenn í báðum liðum sem hafa unnið þetta og vilja vinna bikarinn aftur. Ég held að þetta verði ótrúlega skemmtilegur leikur,“ sagði Mist Rúnarsdóttir.

Mætingin á heimaleiki KR í sumar hefur verið döpur. Mist vonast til að KR-ingar taki sig saman í andlitinu og flykkist á bikarúrslitaleikinn sem KR hefur ekki komist í síðan 2011.

„Ég hef engar áhyggjur af því að stuðningsmenn Selfoss fjölmenni ekki en ég ætla að hnippa í KR-ingana. Þeir hafa ekki verið nógu duglegir að mæta á völlinn í sumar en ég vona að þeir fjölmenni og styðji við sitt lið í bikarúrslitunum,“ sagði Mist.

Innslagið í heild sinni má sjá hér fyrir neðan.