Lík fannst í húsi leikmanns Arsenal

Lík fannst í húsi í eigu Mohameds Elneny, leikmanns Arsenal, í Egyptalandi.

Faðir Elnenys, Nasser, fann líkið þegar hann kom við í húsinu sem er í borginni Mahalla al-Kubra sem er um 100 kílómetra norðan við Kairó.

Lögreglunni var tilkynnt um líkfundinn. Samkvæmt upplýsingum frá henni ætlaði maðurinn að stela rafstrengjum. Það tókst ekki betur en svo að hann fékk rafstuð og dó.

Húsið, þar sem líkið fannst, er nýtt og Elneny-fjölskyldan gaf það nýverið til góðgerðamála.

Elneny fékk upplýsingar um líkfundinn símleiðis. Hann er nýkominn aftur til æfinga hjá Arsenal eftir Afríkukeppnina í Egyptalandi.