Átján ára nýliði bjargaði Atlético Madrid í síðasta leik Griezmanns

Antoine Griezmann lék sinn síðasta leik fyrir Atlético Madrid þegar liðið gerði 2-2 jafntefli við Levante í lokaumferð spænsku úrvalsdeildarinnar í dag.

Fyrr í vikunni greindi Griezmann frá því að hann væri á förum frá Atlético Madrid eftir fimm ára dvöl hjá félaginu.

Griezmann var í byrjunarliði Atlético sem lenti undir á 6. mínútu þegar Erick Cabaco skoraði fyrir Levante. Á 36. mínútu jók Marti Roger forskot heimamanna í 2-0 sem voru hálfleikstölur.

Atlético varð fyrir áfalli þegar Angel Correa fékk að líta rauða spjaldið í upphafi seinni hálfleiks fyrir að sparka í Chema, leikmann Levante.

Rauða spjaldið virtist þó efla Atlético-menn og Rodri minnkaði muninn á 68. mínútu. Ellefu mínútum síðar skoraði hinn 18 ára Sergio Camello jöfnunarmark Atlético í sínum fyrsta leik fyrir aðallið félagsins. Lokatölur 2-2.

Atlético endaði í 2. sæti deildarinnar en Levante í því fjórtánda.