Lögreglan ákærir loftslagsmótmælendur

Talsmaður lögreglunnar í Lundúnum hefur tilkynnt að 28 einstaklingar sem handteknir voru í mótmælunum í vikunni hafi verið ákærðir af lögreglu. Handtökur á loftslagsmótmælunum eru orðnar 715 í það minnsta.

Lögreglan í miðbænum hefur einnig sóst eftir því að fá 200 lögreglumenn að láni frá öðrum lögreglustöðvum á suðaustur Englandi.

Á föstudag fjarlægði lögreglan bleika bátinn sem hafði verið komið fyrir af mótmælendum í miðju Oxford Circus torgi. Báturinn hefur verið eins konar táknmynd mótmælanna sem hafa farið fram síðustu vikuna, en hann var nefndur í höfuðið á myrtum loftslagsaðgerðarsinna, Bertu Caceres.

Báturinn var tekinn í sundur af lögreglu aðeins nokkrum klukkutímum eftir að leikkonan Emma Thompson hafði notað hann sem nokkurs konar svið til að tala við mótmælendur, hvetja þá áfram og mótmæla sjálf.