Hollendingar byrjuðu undankeppnina af krafti

Belgar byrjuðu undankeppni EM 2020 á sigri á Rússum. Króatar höfðu betur gegn Aserum og Hollendingar rúlluðu yfir Hvít-Rússa.

Fyrstu leikirnir í undankeppni EM 2020 fóru fram í kvöld. Keppnin fór fjörlega af stað í Belgíu þar sem Youri Tielemans skoraði fyrir Belga á 15. mínútu en Denis Cheryshev jafnaði mínútu seinna eftir hrikaleg mistök Thibaut Courtois í marki Belga.

Eden Hazard kom heimamönnum yfir rétt fyrir hálfleikinn úr vítaspyrnu og hann tryggði svo sigurinn með marki á 88. mínútu. Leiknum lauk 3-1 fyrir Belgíu.

Hollendingar voru ekki lengi að komast yfir gegn Hvíta-Rússlandi, en Memphis Depay skoraði strax á fyrstu mínútu leiksins. Georginio Wijnaldum tvöfaldaði forystuna á 21. mínútu eftir sendingu Depay.

Depay var allt í öllu því hann skoraði þriðja mark Hollendinga úr vítaspyrnu á 55. mínútu. Það var svo varnarmaðurinn Virgil van Dijk sem fullkomnaði sigurinn, aftur eftir sendingu Depay.

Hollendingar fengu óskabyrjun og setjast á topp C riðils.

Í Króatíu voru það gestirnir í Aserbaísjan sem komust yfir á 19. mínútu. Borna Barisic jafnaði metin fyrir heimamenn á síðustu mínútum fyrri hálfleiks.

Andreij Kramaric tryggði Króötum sigurinn með marki eftir sendingu Ante Rebic á 79. mínútu. Króatar unnu því 2-1 sigur á heimavelli.

Öll úrslit kvöldsins:

C-riðill:

Holland - Hvíta-Rússland 4-0

Norður-Írland - Eistland 2-0

E-riðill:

Króatía - Aserbaísjan 2-1

Slóvakía - Ungverjaland 2-0

G-riðill:

Austurríki - Pólland 0-1

Makedónía - Lettland 3-1

Ísrael - Slóvenía 1-1

I-riðill:

Kýpur - San Marínó 5-0

Kasakstan - Skotland 3-0

Belgía - Rússland 3-1