Ætla að rífa San Siro leikvanginn í Mílanó

Einn frægasti fótboltaleikvangur í heimi heyrir bráðum sögunni til. San Siro leikvangurinn í Mílanó verður nefnilega jafnaður í jörðu á næstu misserum ef marka má fréttir frá Ítalíu.

Samkvæmt tillögunum á að rífa þennan fornfræga leikvang sem hýst hefur bæði leiki AC Milan og Internazionale Milan. AC Milan hefur spilað á leikvanginum frá 1926 en Internazionale byrjaði að spila þar árið 1947.

San Siro to be demolished and rebuilt by 2023 (@Kaus_Pandey17) https://t.co/LRAbMiA2UNpic.twitter.com/QGc7pDJIW8

— CalcioMercato (En) (@CmdotCom_En) March 4, 2019

Giuseppe Meazza leikvangurinn eins og hann heitir formlegu nafni var byggður árið 1926 og það styttist því í hundrað ára afmælið. San Siro verður þó væntanlega ekki uppistandandi eftir sjö ár.

Stefnan er að byggja annan leikvang fyrir AC Milan og Internazionale í aðeins hundrað metra fjarlægð frá San Siro. San Siro verður rifinn en í raun endurbyggður og mun eflaust fá nafnið nýi San Siro eða eitthvað viðlíka.

Ítalska blaðið La Republicca hefur sagt frá þessu og því að bæði borgaryfirvöld og AC Milan hafi gefið grænt ljós á framkvæmdirnar. Aðeins sé beðið eftir samþykki Internazionale sem á líka að vera formsatriði.

Nýi leikvangurinn mun kosta um 600 milljónir evra eða meira en 82 milljarða íslenskra króna. Hann á að vera tilbúinn árið 2023.

Forráðamenn frá bæði AC Milan og Internazionale fóru á dögum til Bandaríkjanna þar sem þeir skoðuðu íþróttaleikvanga eins og MetLife leikvanginn í nágrenni New York borgar.

San Siro er einn frægasti leikvangur heims en þar voru spilaðir leikir á bæði HM 1934 og HM 1990 sem og á EM 1980. Úrslitaleikur Meistaradeildarinnar (og Evrópukeppni meistaraliða) hefur fjórum sinnum farið fram á leikvanginum eða árin 1965, 1970, 2001 og 2016.