Newcastle hætti við að fá yngri bróður Lukaku á síðustu stundu

Ekkert verður af því að Lukaku bræðurnir leiki báðir í ensku úrvalsdeildinni á þessari leiktíð en allt útlit var fyrir að Jordan Lukaku, yngri bróðir Romelu Lukaku, væri að ganga til liðs við Newcastle United að láni frá ítalska úrvalsdeildarliðinu Lazio.

Jordan gekkst undir læknisskoðun hjá Newcastle í gærmorgun en í gærkvöldi sendi Newcastle frá sér tilkynningu þess efnis að ekkert yrði af félagaskiptunum.

Ekki var gefin upp ástæða fyrir því að skiptin gengu ekki í gegn. 

SkySports fréttastofan telur sig hafa heimildir fyrir því að þessi 24 ára gamli bakvörður hafi ekki staðist læknisskoðun en hins vegar segja fréttir frá Ítalíu að Newcastle hafi ekki verið tilbúið að borga þann hluta af launum kappans sem Lazio óskaði eftir.