Sat heima í Noregi og fjarstýrði nauðgunum á 65 barnungum stúlkum

Norskur karlmaður hefur verið dæmdur í tólf og hálfs árs fangelsi fyrir kynferðisofbeldi gegn tugum filippseyskra stúlkna. Maðurinn pantaði ofbeldið á netinu og fylgdist með verknaðinum frá heimili sínu. Um er að ræða þyngsta dóm sinnar tegundar sem fallið hefur í Noregi, samkvæmt frétt norska ríkisútvarpsins NRK.

Alvarlegasta brotið gegn 8-10 ára stúlku

Maðurinn er sjötugur og búsettur í Sunnmøre í vesturhluta Noregs. Brot hans spanna eins til tveggja ára tímabil en hann pantaði og greiddi fyrir ofbeldi gegn 65 filippseyskum stúlkum, ungbörn þar með talin. Ofbeldinu var streymt í gegnum vefmyndavél og fylgdist maðurinn með því frá heimili sínu í Noregi.

Alvarlegasta brotið var gegn stúlku á aldrinum átta til tíu ára sem var nauðgað í mynd í fjórtán mínútur. Þá var maðurinn einnig dæmdur fyrir að hafa brotið gegn þriggja ára stúlku en verknaðurinn er sagður hafa staðið yfir í fjörutíu mínútur.

 

Greiddi samtals sjö milljónir fyrir ofbeldið

Maðurinn neitaði fyrst sök í alvarlegustu ákæruliðunum en „lagði síðar öll spilin á borðið“, líkt og segir í frétt NRK. Hann sagðist hafa verið á slæmum stað í einkalífinu þegar hann heimsótti fyrst vefsíður sem buðu upp á umrætt ofbeldi gegn greiðslu. Þar hafi hann komist í samband við konur sem sögðust mæður stúlknanna og þær hafi hvatt hann til að panta voðaverkin.

Maðurinn er talinn hafa greitt samtals nær hálfa milljón norskra króna, eða um sjö milljónir íslenskra króna, fyrir ofbeldið gegn stúlkunum. Norska lögreglan komst á snoðir um brot hans eftir ábendingu frá Bandarísku alríkislögreglunni, FBI. Í dómnum yfir manninum er hann sagður hafa átt þátt í að viðhalda hryllilegum kynlífsiðnaði með brotum sínum.