Kjósin og Grímsá á góðu róli

Það er ansi greinilegt af þeim fréttum sem berast af bökkunum að laxveiðin á vestur og suðurlandi virðist ætla að vera góð í sumar.

Laxá í Kjós hefur notið þess, en reyndar líka stundum liðið fyrir, að það hefur verið blautt í sumar en veiðin í ánni hefur verið mjög fín það sem af er tímabilinu.  "Laxá í Kjós er mjög góð og óvenju mikið af stórlaxi. Dagarnir eru að gefa okkur 20-30 laxa auk hefðbundinna stórsjóbirtinga. Það vekur mikla athygli að laxinn hikar við að ganga upp Bugðu, og fyrir vikið er svokölluð Pollabreiða gegnt veiðihúsinu þétt setin laxi. Ástæðan er sú að enn er snjóbráð úr norðanverðri Esjunni, sem er ótrúlegt að við erum að detta inn í síðustu viku júlímánaðar. Fyrir vikið er Bugða kaldari en Laxáin og er líkt og laxinn bíði eftir að hitastig árinnar hækki" sagði Haraldur Eiríksson hjá Hreggnasa um stöðu mála í Laxá í Kjós.

"Grímsá er í sama takti og Kjósin, nema að nú er komin mikil ferð á laxinn og efstu tvö svæðin sterkari en neðri hlutinn. Laxinn virðist ekki lengur hinkra við Laxfoss heldur gengur beint upp úr Myrkhyl. Lúsugir laxar eru að veiðast á dalnum og veiði góð. Athygli vekur að óvenju mikið er af sjóbirtingi í Grímsá, og sem dæmi veiddist í dag 83cm birtingur í Grafarhyl" bætir Haraldur við í samtali við Veiðivísi.