Fín bleikjuveiði og þétt setnir bakkar

Það hefur verið mjög fín bleikjuveiði í Þingvallavatni í sumar en veiðin fór hressilega af stað þegar aðeins var liðið á júní.

Þjóðgarðurinn við Þingvallavatn hefur verið mikið sóttur í sumar og þegar fréttir af góðri veiði fóru að berast jókst heldur betur straumur veiðimanna að vatninu.  Suma daga hefur verið svo mikið af veiðimönnum við vatnið að næsta vonlaust var að fá bílastæði við vinsælustu veiðistaðina.

Veiðin hefur verið góð og upp úr miðjum júní var hún betri en hún verið verið í fjölda mörg ár og bleikjurnar hafa inná milli þessarar hefðbundnu stærðar um 2-3 pund verið mjög vænar.  Það hafa verið að veiðast margar um 4-7 pund í sumar en sú stærsta sem við höfum frétt af og birt myndir af var veginn 9 pund og þykk eftir því.  Veiðin heldur áfram að vera góð við vatnið og hún getur haldið þessum dampi fram í ágúst.  Ef veðurspá næstu daga um sólskin og hlýindi rætist eiga enn fleiri eftir að mæta á bakkann því á svoleiðis dögum getur takan orðið enn betri en á blautum dögum og þá sérstaklega á morgnana og á kvöldin.