Þverá og Kjarrá aflahæstar það sem af er sumri

Nú er aðaltíminn í gangi í laxveiðiánum og það er farið að bera á því í veiðitölum vikunnar.

Nýjar veiðitölur fyrir liðna viku voru birtar á vefnum www.angling.is og samkvæmt þeim er heildarveiðin mest það sem af er sumri í Þverá og Kjarrá en þar hafa veiðst 1.525 laxar.  Mesta veiðin á stöng er í Urriðafossi en heildarveiðin þar er 842 laxar á fjórar stangir.  Veiðitölurnar á vesturlandi taka mikinn kipp og er greinilegt að smálaxagöngurnar eru sterkar í ár og kemur eins árs laxinn vel haldinn úr sjó.  Vikuveiðin var afskaplega góð í nokkrum ám og sem dæmi var vikuveiðin í Þverá og Kjarrá 339 laxar, í Norðurá 291 lax, í Miðfjarðará 244 laxar, Ytri Rangá 347 laxar, Haffjarðará 235 laxar og í Langá á Mýrum 262 laxar.

Árnar á vesturlandi eru komnar í sannkallað gullvatn og það er ennþá mjög góður kraftur í göngunum svo það stefnir í að þetta sumar verði vel yfir meðallagi.  Það ber mun minna á smálaxi á norðurlandi og er það farið að valda nokkrum áhyggjum að láti þær ekki sjá sig verði þetta sumar langt undir væntingum í þeim landshluta en það skyldi engin örvænta ennþá því það hefur alveg gerst áður að þær hafi verið seinna á ferð en venjulega en það er þó harla ólíklegt að það verði í því magni sem þarf til að hífa árnar á norðurlandi upp á topp 10 listann yfir aflahæstu árnar.  Miðfjarðará stendur að vísu upp úr þar sem fyrr og greinilegt að áin fylgir einhverjum öðrum lögmálum en hinar.

Fimm aflahæstu árnar eru:

1. Þverá og Kjarrá  1.525 laxar

2. Norðurá  1.125 laxar

3. Urriðafoss  842 laxar

4. Miðfjarðará  759 laxar

5. Ytri Rangá  748 laxar