Lifnar yfir Soginu

Sogið átti mjög dapurt sumar í fyrra og margir unnendur þess hafa haft áhyggjur af framtíð laxveiða í ánni.

Það virðist samt vera einhver viðsnúningur í Soginu miðað við þær fréttir sem eru að berast af bakkanum.  Öflugt gengi veiðimanna er nú við veiðar í Bíldsfelli og voru í morgun komnir með fjóra laxa á land og þar af þrjá úr Matarpollum ef heimilidir okkar eru réttar.  Matarpollar er nú líklega sá staður sem minnst er veiddur í Soginu enda þykir hann ekki mjög gjöfull miðað við t.d. Efri og Neðri Garð eða Sakkarhólma. 

Af Ásgarði eru síðan góðar fréttir en þar er Árni Baldursson hjá Lax-Á við veiðar og í gærkvöldi landaði hann tveimur stórum löxum í Símastreng og öðrum fimm neðar í ánni.  Hann átti þó sérstaka stund við Frúarstein í gærkvöldi þegar hann setti í og missti níu laxa í beit.  Það er greinilegt að það er meiri lax að ganga í Sogið en í fyrra og Sogið hefur yfirleitt ekki byrjað að gefa almennilega fyrr en eftir miðjan júlí.  Það er því spennandi að sjá hvernig næstu hollum vegnar á þessu skemmtilega veiðisvæði.