Hernandez segir leikaraskap „einn sterkasta hluta leiks míns“

Franski landsliðsmaðurinn Lucas Hernandez sagðist hafa látið sig falla auðveldlega til jarðar til þess að eyða tíma undir lok leiks Frakka og Ástrála á HM í Rússlandi um helgina.

Frakkar komust yfir í leikun á 80. mínútu með sjálfsmarki Aziz Behich eftir að bæði lið höfðu skorað úr vítaspyrnum fyrr í leiknum. Eftir að sigurmarkið kom fór vinstri bakvörðurinn að fara oftar í jörðina til þess að éta upp tímann á klukkunni.

„Eins og sást í leiknum gegn Ástralíu þá eru augnablik þar sem ég ýki aðeins,“ sagði Hernandez á blaðamannafundi í gær.

„Þetta er hluti af leiknum og ég er vanur að gera þetta. Þetta hjálpar liðinu að kaupa sér smá tíma.“

Hernandez er á mála hjá Atletico Madrid og sagði þjálfara sinn þar, Diego Simeone, hvetja sig í þessa tilburði.

„Ég hef alltaf verið svona. Ég lærði þetta á ellefu árum hjá Atletico og þetta er einn sterkasti hluti leiks míns.“

Frakkar mæta Perú í öðrum leik sínum á HM á fimmtudag.