Ísland á tvo á listanum yfir tíu elstu útileikmenn HM í Rússlandi

Íslenskir landsliðsmenn komast inn á topplistann yfir þá leikmenn á HM í fótbolta í Rússlandi sem hafa lifað lengst.

Kári Árnason og Ólafur Ingi Skúlason eru nefnilega báðir á listanum yfir tíu elstu útileikmenn HM í Rússlandi.

Þrír leikmenn á HM í ár eru fæddir fyrir 1980 og sá elsti er Rafael Márquez frá Mexíkó sem er mættur á sitt fimmta heimsmeistaramót á ferlinum.

Rafael Márquez er fæddur í febrúar 1979 og er orðinn 39 ára fyrir tæpu hálfu áru síðan. Hinir tveir hafa enn ekki haldið upp á 39 ára afmælið. Rússinn Sergei Ignashevich gerir það í júlí en Ástralinn Tim Cahill ekki fyrr en í desember.

Panama á flesta leikmenn á topp tíu listanum eða þrjá en Ísland á tvo eins og Portúgal.

Kári Árnason er fæddur í október 1982 og verður því 36 ára gamall í haust. Hann er rúmum fimm mánuðum eldri en Ólafur Ingi Skúlason sem er fæddur í apríl 1983. Báðir eru þeir á leiðinni í Pepsi-deildina eftir HM því Kári mun spila með Víkingum en Ólafur Ingi með Fylki.

Elsti leikmaðurinn á HM þegar við tökum markmennina með er aftur á móti Egyptinn Essam El-Hadary en hann hélt upp á 45 ára afmælisdaginn sinn í janúar síðastliðnum.  

Svo eigum við eftir að sjá til hvaða leikmenn fá að spila með sínum þjóðum á mótinu. Það er öruggt að þar verður Kári Árnason í stóru og mikilvægu hlutverki með íslenska landsliðinu.

Elstu útileikmenn á HM í Rússlandi 2018:

1. Rafael Márquez, Mexíkó (39 ára)

2. Sergei Ignashevich, Rússlandi (38 ára)

3. Tim Cahill, Ástralíu (38 ára)

4. Felipe Baloy, Panama (37 ára)

5. Blas Pérez, Panama (37 ára)

6. Bruno Alves, Portúgal (36 ára)

7. Luis Tejada, Panama (36 ára)

8. Kári Árnason, Íslandi (35 ára)

9. Pepe, Portúgal (35 ára)

10. Ólafur Ingi Skúlason, Íslandi (35 ára)



Elstu leikmenn á HM í Rússlandi 2018:

1. Essam El-Hadary, Egyptalandi (45 ára)

2. Rafael Márquez, Mexíkó (39 ára)

3. Sergei Ignashevich, Rússlandi (38 ára)

4. Tim Cahill, Ástralíu (38 ára)

5. José de Jesús Corona, Mexíkó (37 ára)

6. Felipe Baloy, Panama (37 ára)

7. Blas Pérez, Panama (37 ára)

8. Willy Caballero, Argentínu (36 ára)

9. Bruno Alves, Portúgal (36 ára)

10. Brad Jones, Ástralíu (36 ára)