Rooney lendir í Washington á morgun

Samkvæmt heimildum Sky Sports þá verður Wayne Rooney orðinn leikmaður DC United fyrir vikulok.

Sky segir í dag að Rooney muni lenda í Bandaríkjunum á morgun til þess að klára samningaviðræðurnar og gangast undir læknisskoðun hjá bandaríska félaginu.

Þessi félagaskipti hafa legið í loftinu síðustu tvær vikur en DC ætlar að greiða Everton 12 milljónir punda fyrir hinn 32 ára gamla Rooney.

Þó svo ekki sé búið að ganga frá neinu bendir fátt annað til þess en að allt sé á réttri leið. Washington Post sagði í gær að Rooney væri þegar farinn að leita að húsi í höfuðborg Bandaríkjanna.