36 dagar í HM: Lehmann notaði svindlmiða og bókstaflega las Argentínumenn

Það kannast kannski einhverjir við að hafa mætt með lítinn svindlmiða í próf í æsku til að hjálpa sér í gegnum erfiðasta kaflann. Kannski ekki.

Þó hann hafi ekki beint kallast svindlmiði var einn slíkur notaður í frægri vítaspyrnukeppni Þýskalands á móti Argentínu á HM 2006 í Þýskalandi. Þar bókstaflega las Jens Lehmann Argentínumennina eins og opna bók. Eða réttara sagt eins og lítinn miða.

Þjóðverjar ætluðu sér heimsmeistaratitilinn á heimavelli en fengu erfitt verkefni í átta liða úrslitum þar sem að þeir mættu Argentínu á Ólympíuvellinum í Berlín.

Eftir markalausan fyrri hálfleik var það varnarmaðurinn Roberto Ayala sem koma Argentínu yfir á 49. mínútu og þar til að tíu mínútur voru eftir stefndi ekki í annað en að gestgjafarnir væru úr leik í keppninni.

En, eins og oft áður þegar að Þýskalandi vantaði mark, var framherjinn Miroslav Klose mættur til bjargar. Hann skoraði jöfnunarmarkið á 80. mínútu og kom leiknum í framlengingu. Eitt af fjórtán mörkum Klose á HM en hann er markahæstur í sögu lokakeppninnar.

Pressa vegna óvináttu

Ekkert mark var skorað í framlengingunni og því þurfti að grípa til vítaspyrnukeppni. Þó að alltaf sé sagt að engin pressa sé á markvörðum í vítaspyrnukeppnum var furðulega mikil pressa á Lehmann.

Þannig var nefnilega í pottinn búið að hann var búinn að hirða stöðuna af sjálfum Oliver Kahn, manninum sem hafði fjórum árum áður verið kjörinn besti leikmaður HM, og var þá að flestra mati besti markvörður í sögu Þýskalands.

Lehmann og Kahn náðu ekki saman svo vægt sé til orða tekið. Þeir þoldu ekki hvorn annan og samkeppnin var ævintýraleg. Þess vegna þurfti Lehmann virkilega á því að halda að vera hetjan í Berlín til að heyra ekki gagnrýnisraddir um að Kahn ætti að vera í markinu.

Það er skemmst frá því að segja að Lehmann varð hetjan, en hann varði tvær vítaspyrnur frá Argentínumönnum en gerði það á nýstárlegan hátt. Það hjálpaði svo til að Þýskaland skoraði úr öllum sínum spyrnum. Algjört sjokk. Þýskaland vann í vítaspyrnukeppni. Enginn séð það áður.

Köpke vann heimavinnuna

Það vakti strax athygli í vítaspyrnukeppninni að fyrir hverja spyrnu Argentínumanna reif Lehmann upp lítið blað, lítinn svindlmiða, úr sokknum sínum. Hann las aðeins á miðann, skilaði honum aftur í sokkinn og skutlaði sér svo í rétt horn í hverri einustuspyrnu Argentínumanna.

Fyrsta lá í netinu en Lehmann varði svo auðveldlega frá Roberto Ayala. Hann gekk svo frá keppninni og sendi Þýskaland í undanúrslitin með því að vera frá miðjumanninum Estebán Cambiasso og fjórðu spyrnuna í röð fór hann í rétt horn.

Hvað var það sem stóð á miðanum sem var blað merkt hótelinu sem liðið gisti á? Jú, þar var markvarðaþjálfarinn Andreas Köpke búinn að skrifa niður líklegasta staðinn sem allir í argentínska landsliðinu myndu skjóta á ef svo færi að grípa þyrfti til vítaspyrnukeppni.

Köpke, í samvinnu við hollenska þjálfarann Huub Steven, horfði á hvorki fleiri né færri en 13.000 vítaspyrnur til að undirbúa markvörðinn sinn fyrir vítaspyrnu á móti öllum mögulegum og ómögulegum mótherjum á HM. Fáránleg vinna sem heldur betur skilaði sér.

„Allt fór eins og við vorum að búast við. Við tókum engar áhættur,“ sagði Andreas Köpke þegar að hann rifjaði upp vítaspyrnukeppnina frægu í viðtali við FIFA.com á tíu ára afmæli heimsmeistaramótsins í Þýskalandi.

Happy birthday to ex-#Germany keeper Jens Lehmann, whose penalty kick cheat sheet helped win the 2006 World Cup QF vs Argentina! #tbt pic.twitter.com/h5aRGZsdRk

— COPA90 US (@COPA90US) November 10, 2016

Hvar er miðinn nú?

Lehmann viðurkenndi síðar að hann gat varla lesið á miðann fræga. „Andy, af hverju þurftir þú að nota blýant? Það getur enginn lesið þetta,“ sagði hann við sjálfan sig er Cambiasso steig á punktinn. Það kom þó ekki að sök.

Þýska blaðið Bild komst yfir miðann og birti af honum myndir og skrifaði nokkrar greinar en bauð hann svo upp á endanum í frægum góðgerðarþætti í Þýskalandi. Utz Claassen, framkvæmdastjóri þýska orkurisans EnBW keypti hann fyrir eina milljón evra og rann peningurinn óskiptur til hjartveikra barna.

Claassen ætlaði sér aldrei að eiga miðann að eilífu. Hann átti hann í nokkra mánuði en gaf hann svo til HM-safns FIFA þar sem að hann er varðveittur í dag.

Argentínumenn hafa aldrei tekið miðann í sátt. Juan Roman Riquelme, miðjumaður liðsins, sagði opinberlega að ekkert hefði verið á miðanum. Þetta hefði einfaldlega verið taktík til að taka sig og liðsfélaga sína úr sambandi.

Vísir telur niður fyrir HM í knattspyrnu sem hefst í Rússlandi þann 14. júní. Íþróttafréttamenn Vísis munu fylgja íslenska landsliðinu eftir hvert fótmál ytra.