Neuer efast um að ná HM

Manuel Neuer er af mörgum talinn besti markvörður heims en ýmislegt bendir til þess að hann verði ekki með Þjóðverjum á HM í Rússlandi í sumar.

Neuer hefur ekki leikið með Bayern Munchen síðan hann fótbrotnaði í september síðastliðnum.  Vonir stóðu til um að hann myndi ná síðustu leikjum Bayern á tímabilinu en nú hefur verið staðfest að hann verði ekki með Bæjurum í lokaumferðinni um komandi helgi.

Markvörðurinn öflugi er engu að síður byrjaður að æfa og gæti mögulega náð lokaleik tímabilsins sem er bikarúrslitaleikur þann 19.maí næstkomandi.

„Það gengur vel og mér líður vel en ég þarf að taka rétta ákvörðun, bæði fyrir mig, liðið og Þýskaland. Ég reyni að verða betri á hverjum degi og er að reyna að koma mér í eins gott stand og ég get, eins fljótlega og mögulegt er.“

„Við sjáum til hvort það sé nóg en ég verð að viðurkenna að það er erfitt að ímynda sér að spila í keppni eins og HM án þess að vera í góðri leikæfingu,“ segir Neuer.

4.júní er dagurinn sem tilkynna þarf 23 manna leikmannahóp fyrir HM og vonast Þjóðverjar eftir því að Neuer verði kominn í gott form þá.

Þjóðverjar eru ríkjandi heimsmeistarar og eru í riðli með Suður-Kóreu, Mexíkó og Svíþjóð í Rússlandi í sumar.

Heimsmeistararnir eru alls ekki á flæðiskeri staddir þrátt fyrir meiðsli Neuer en Marc-Andre ter Stegen, markvörður Barcelona, hefur staðið vaktina á milli stanganna í fjarveru Neuer.