55 fiskar á land á einum degi

Urriðaveiðin í Þingvallavatni er farin í gang og það er óhætt að segja að hún fari afskaplega vel af stað.

Það svæði sem er líklega þekktast er kennt við ION en það er Þorsteinsvík og Ölfusvatnsárós.  Veiðimenn sem voru þar við veiðar 17. apríl voru í góðum málum en alls fengu þeir 55 fiska á einum degi og var mikið af því 70-80 sm fiskur.  Það verður spennandi að fylgjast með veiðitölum úr urriðaveiðinni í Þingvallavatni næstu vikurnar en besti tíminn er framundan og ljóst að það virðist vera mikið af fiski á svæðunum og urriðinn greinilega í góðum málum í vatninu.

Önnur svæði sem eru mikið sótt má nefna Svörtukletta og Kárastaði en að sama skapi fara margir veiðimenn bara í Þjóðgarðinn til að freista þess að ná eins og einum stórum urriða.  Þó það sé minna af honum við bakkann hjá þjóðgarðinum eru nokkrir staðir þar sem hann greinilega heldur sig mikið á og þeir veiðimenn sem vita hvar hann liggur ná yfirleitt einum eða tveimur í hverri ferð séu aðstæður réttar.  Það er þó heldur erfitt að fá þá til að deila því hvar þessir staðir eru enda ekki skrítið því kæmist það í almannaróm væri líklega fljótt þétt setið við þá staði.