Duterte vill rjúfa Rómarsamþykktina

Forseti Filippseyja, Rodrigo Duterte, hvatti í dag þá sem eru hluti af Rómarsamþykkt um Alþjóðlega sakamáladómstólinn (ICC) um draga sig úr henni. Þetta kemur fram á vef Reuters.

Í síðasta mánuði hóf Alþjóðlegi sakamáladómstóllinn athugun á fíkniefnastríði forsetans sem hefur leitt til dauða þúsunda frá því það hófst í júlí 2016.

Í síðustu viku lét Duterte aðalritara Sameinuðu þjóðanna, Antonio Guterres, vita af því að hann hefði í hyggju að segja Filippseyjar frá samþykktinni. Hann segir að athugun Alþjóðlega sakamáladómstólsins ekki vera neitt annað en ósvífna árás Sameinuðu þjóðanna auk þess sem það sé brot á réttlátri málsmeðferð.

„Mér mun takast að sannfæra alla aðila samkomulagsins um að forða sér ekki seinna en strax,“ segir Duterte.

Lögreglan á Filippseyjum hefur drepið um fjögur þúsund manns á síðustu nítján mánuðum. Þetta hefur valdið alþjóðasamfélaginu miklum áhyggjum og sumir telja að dánartíðnin sé mun hærri en yfirvöld hafa gefið út.

Lögregluyfirvöld segja að allt þetta fólk hafi dáið í lögmætum aðgerðum gegn fíkniefnum. Fólkið hafi sýnt af sér ofbeldisfulla hegðun þegar lögreglan hafi reynt að handtaka það og þess vegna hafi lögreglan ákveðið að skjóta það.