Sportveiðiblaðið er komið út

Nýtt tölublað Sportveiðiblaðsins er komið út og sem fyrr er blaðið fullt af skemmtilegum greinum og fróðleik fyrir veiðimenn og ala þá með áhuga á stang- og skotveiði.

Í blaðinu má meðal annars finna ítarlegt viðtal við Höllu Bergþóru Björnsdóttur, lögreglustjóra á Norðurlandi um áhuga hennar á laxveiðum og Laxá í Aðaldal. Ólafur Vigfússon í Veiðihorninu skrifar um ævintýralega veiðiupplifun á Jólaeyju þar sem þau hjónin voru við veiðar nýlega (Kiritimati) og eins er skemmtilegt viðtal við Jónas Marteinsson.

Harpa Hlín Þórðardóttir segir okkur frá veiðum í Eistlandi, spjallað er við Gústa Morthens og Hrefnu Halldórsdóttur, en þau voru að hætti rekstri á verslunni Veiðisport á Selfossi, eftir 30 ára rekstur og það er óhætt að segja að margir veiðimenn sjái eftir þeirri skemmtilegu búð. Í blaðinu er veiðistaðalýsing á Hafralónsá í Þistilfirði og Mýrarkvísl. ingvi Örn Ingvason, sonur Ingva Hrafns, skrifar um þrjá ættliði við Fljótáa. Haraldur Eiríksson segir frá sjóbirtingum í Kjósinni og skráðar eru sögur úr Straumfjarðará, auk fleiri pistla og greina eftir m.a. Árna Pétur Hilmarsson, Reyni M Sigmundsson, Val Pálsson og Guðmund Þór Róbertsson.