Bókareintak með athugasemdum frá Darwin boðið upp

Útprentað eintak af þriðju útgáfu Uppruna tegundanna (On the Origin of Species) með skriflegum athugasemdum höfundarins sjálfs, Charles Darwin, fer á uppboð í næsta mánuði. Uppboðshúsið Christie‘s sér um uppboðið og telja sérfræðingar á þeirra vegum að eintakið sé virði 300-500 þúsund punda, andvirði 41,4-69 milljón króna samkvæmt gengi dagsins í dag. The Guardian greinir frá.

Talið er að Darwin hafi ritað athugasemdirnar til undirbúnings fjórðu útgáfu bókarinnar og sent til þýska þýðandans HG Bronn. Við andlát þýðandans hafi bókin orðið að eigu steingervingafræðingsins Melchior Neumayr og eftirleiðis afhenst afkomendum hans.

Darwin, sem setti fram þróunarkenninguna árið 1859, leitaðist stöðugt eftir að bæta við kenningar sínar og hugmyndir. Þannig hripaði hann niður á blað og í útprentuð eintök af bókum sínum þær viðbætur sem hann taldi nauðsynlegt að fram kæmu.

Einn af sérfræðingum uppboðshússins Christie‘s, Meg Ford, segir að eintök með punktum höfundarins séu afar sjaldgæf. Áður fyrr hafi selst eintak af fyrstu útgáfu bókarinnar, án athugasemda Darwins, og hafi það verið andvirði 269 þúsund punda, eða um 37 milljón íslenskra króna.

Uppboðið fer sem áður segir fram í næsta mánuði.