Mitsubishi ætlar að auka framleiðsluna um 40%

Mitsubishi hefur nýverið kynnt áform sín um 40% aukna framleiðslu á næstu 3 árum og ætlar fyrirtækið fara úr framleiðslu 926.000 bíla í fyrra í 1,3 milljón bíla árið 2020. Renault-Nissan á nú 34% ráðandi hlut í Mitsubishi og þar á bæ eru greinilega mikil áform um stórsókn Mitsubishi merkisins. Í því augnamiði verður sett mikið fjármagn í þróun bíla fyrir Mitsubishi. Meiningin er að auka fjárveitingar til þróunar um 50% og verja til þess 125 milljörðum króna. Mitsubishi ætlar að sækja að mun meiri þrótti á bílamarkaði í Kína, Bandaríkjunum og Suðaustur Asíu.

Mitsubishi ætlar að kynna til sögunnar 11 nýja bíla á næstu þremur árum og þar á meðal verður Mitsubishi Eclipse Cross jepplingur sem ætlaður er einnig á Evrópumarkað. Áhersla verður á framleiðslu fjórhjóladrifinna bíla og ekki síður verður áherslan á bíla með tengiltvinndrifrás. Í nýrri sóknaráætlun Mitsubishi er markmiðið að ná 10% markaðshlutdeild í Suðaustur Asíu, en þar er Mitsubishi sterkt fyrir.

Ennfremur er stefnt að 30% vextí í Bandaríkjunum og að selja þar 130.000 bíla á ári. Í Kína eru áformin ennþá metnaðarfyllri og er þar stefnt á tvöföldun í sölu og að selja þar árlega 220.000 bíla. Árið 2020 er stefnan að Mitsubishi selji einnig 220.000 bíla í Evrópu. Mitsubishi stefnir á að ná hagnaði af sölu upp í 6%, eða 0,3% meira en á síðasta ári. Á það meðal annars að nást með sameiginlegri notkun íhluta með Renault og Nissan bílum og stærðarhagkvæmni þessa stærsta bílarisa heims.