Lazio fyrst ítalskra liða í tvö ár til að vinna Juventus á útivelli

Lazio sótti sigur til Tórínó þar sem þeir unnu 2-1 sigur gegn ítölsku meisturunum í Juventus í ítölsku deildinni í dag.

Var þetta fyrsta tap Juventus í ítölsku deildinni á heimavelli frá 23. ágúst árið 2015 eða í rétt rúmlega tvö ár.

Douglas Costa kom heimamönnum yfir um miðbik fyrri hálfleiks og leiddi Juventus í hálfleik 1-0. Tvö mörk frá Ciro Immobile í upphafi seinni hálfleiks þýddi að Juventus var skyndilega undir á ógnarsterkum heimavelli sínum.

Ítölsku meistararnir fengu tækifæri til að jafna metin í uppbótartíma þegar vítaspyrna var dæmd á Lazio en myndbandsdómgæsla varð til þess að vítaspyrnan var dæmd.

Á punktinn steig Argentínumaðurinn Pablo Dybala en honum brást bogalistin á 97. mínútu leiksins.

Stuttu síðar var flautað til leiksloka en þetta þýðir að Napoli nær tveggja stiga forskoti á toppi deildarinnar og getur bætt við það þegar þeir mæta Roma í kvöld.