Napoli komið með fimm stiga forskot

Napoli nýtti sér mistök Juventus og náði fimm stiga forskoti á toppi ítölsku deildarinnar í knattspyrnu með 1-0 sigri á Roma á útivelli í kvöld.

Nágrannar Roma í Lazio gerðu sér lítið fyrir og lögðu Juventus að velli fyrr í dag á heimavelli Juventus. Var þetta í fyrsta skiptið í rúm tvö ár sem Juventus tapaði leik á heimavelli í deildinni.

Lorenzo Insigne skoraði eina mark leiksins á 20. mínútu en Napoli hefur haldið hreinu í sex af níu leikjum liðsins til þessa.

Næsti leikur liðsins er annar krefjandi leikur þegar þeir taka á móti Inter en Inter getur minnkað forskot Napoli niður í tvö stig þegar þeir mæta nágrönnum sínum í AC Milan á morgun.