Viljum stærri hluti og ætlum okkar að komast á HM

Strákarnir okkar í íslenska karlalandsliðinu í fótbolta æfðu í fyrsta sinn sem hópur í Antalya í Tyrklandi í gær við frábærar aðstæður. Aron Einar Gunnarsson landsliðsfyrirliði er enn þá mjög tæpur fyrir leikinn vegna meiðsla í rassvöðva og þá yfirgaf Hannes Þór Halldórsson, markvörður liðsins, æfinguna ansi snemma.

Allir aðrir eru klárir í slaginn og á meðal þeirra er vængmaðurinn Jóhann Berg Guðmundsson sem hefur verið einn besti leikmaður Íslands í undankeppninni. Þessi leikmaður Burnley í ensku úrvalsdeildinni óttast ekki Tyrki þó að hann beri vitaskuld virðingu fyrir gæðum liðsins og þessum erfiða útivelli þar sem heimamenn tapa helst ekki leik.

„Ef við ætlum beint á HM þá þurfum við að vinna þessa tvo leiki. Það er alveg klárt. Þetta er erfiður útileikur sem við erum að fara í en við vitum svo sem að við getum unnið þetta lið. Það er samt eiginlega ekki hægt að bera þá saman á heimavelli og útivelli þannig að þetta verður erfitt. Við höfum samt fulla trú á því að við getum unnið þetta lið,“ segir Jóhann Berg.

Gátum ekki neitt

Kantmaðurinn úr Kópavogi fer ekkert í felur með skoðun sína beðinn um að horfa um öxl og fara yfir muninn á frammistöðunni á móti Finnlandi og svo Úkraínu en tapið gegn Finnum gæti reynst dýrkeypt.

„Fótbolti er bara svona. Við gátum ekki neitt á móti Finnlandi, það verður bara að segjast alveg eins og er. Þrátt fyrir það áttum við að skora og ná að minnsta kosti í jafntefli,“ segir Jóhann Berg en strákarnir svöruðu fyrir þá frammistöðu með frábærum leik og enn betri sigri á móti Úkraínu.

„Við ákváðum því bara að mæta dýrvitlausir til leiks á móti Úkraínu og sýndum hvers megnugir við erum.“

Hungrið til staðar

Ef einhver óttaðist um að strákarnir væru orðnir kærulausir eða saddir eftir frammistöðuna á móti Finnlandi voru þeir fljótir að skrúfa fyrir það rugl með sigrinum gegn Úkraínu. Í heildina hefur liðið spilað mjög vel í erfiðum riðli og stendur nú á barmi þess að komast að minnsta kosti í umspil um sæti á HM 2018 í Rússlandi.

„Það voru eflaust margir sem hugsuðu eftir EM að þetta væri nú bara komið hjá þessu liði og allir væru orðnir saddir. Það góða er að HM er enn stærra en EM og við viljum fara á eitthvað enn þá stærra,“ segir Jóhann Berg.

„Það hefur líka sýnt sig í þessari keppni. Við erum í góðri stöðu í erfiðasta riðlinum en fjögur lið í þessum riðli voru á EM. Það verður bara að segjast eins og er að við höfum gert vel en við erum ekki saddir og ætlum okkur á HM.“