Blikar búnir að fá á sig jafn mörg mörk og tímabilin 2015 og 2016 til samans

Staða Breiðabliks í Pepsi-deild karla er ekki góð. Þegar tvær umferðir eru eftir eru Blikar í 7. sæti með 24 stig, fjórum stigum frá fallsæti. Breiðablik tapaði 4-3 fyrir Grindavík í gær en þetta var þriðja tap liðsins í röð.

Staðan Breiðabliks verður enn verri ef Víkingur Ó. vinnur Víking R. í síðasta leik 20. umferðar í dag.

Öfugt við síðustu tvö ár hefur varnarleikurinn verið helsti Akkilesarhæll Breiðabliks í sumar.

Blikar fengu á sig fjögur mörk í Grindavík í gær og hafa nú fengið á sig 33 mörk í 20 leikjum í Pepsi-deildinni.

Til samanburðar fékk Breiðablik á sig 33 mörk samtals 2015 og 2016, í 44 deildarleikjum.

Blikar fengu aðeins 13 mörk á sig 2015 og héldu 12 sinnum hreinu. Í fyrra fengu þeir 20 mörk á sig og héldu átta sinnum hreinu.

Breiðablik þurfti að bíða fram í 9. umferð eftir því halda hreinu í fyrsta sinn í ár. Blikar hafa aðeins þrisvar sinnum haldið hreinu í allt sumar.

Breiðablik á eftir að mæta ÍBV heima og FH úti í síðustu tveimur umferðunum í Pepsi-deildinni.

Varnarleikur Breiðabliks:

2015: 13 mörk fengin á sig, 12 sinnum haldið hreinu

2016: 20 mörk fengin á sig, 8 sinnum haldið hreinu

2017: 33 mörk fengin á sig, 3 sinnum haldið hreinu