Besta opnun Stóru Laxár fyrr og síðar

Stóra Laxá er að koma feykilega sterk inn í sumarið með frábærum opnunum á sínum svæðum og uppistaðan er fallegur tveggja ára lax.

Við greindum frá opnun á svæði 4 sem var 42 laxar og er sú opnun líklega ein sú besta á því svæði frá upphafi.  Spennan fyrir opnun á svæðum 1 og 2 sem eru veidd saman og svo svæði 3 var því mikil og óhætt að segja að Stóra Laxá hafi ekki svikið neinn.  Fyrsta hollið á svæði 1 og 2 landaði 46 löxum og af því voru 43 10-16 punda tveggjá ára laxar og þrír eins árs laxar og það er líklega leitun að öðru eins stórlaxahlutfalli á landinu þessa dagana.

Og sagan heldur áfram á svæði 3 en þar hafa tvær stangir landað 15 löxum á tveimur dögum og allt stórlax frá 75 til 95 sm.  Það er mikill fiskur í ánni og takan með því allra besta.  Samtals hefur því opnun Stóru Laxár gefið 103 laxa með aðeins þessa þrjá áðurnefndu eins árs laxa en rest stórlax.  Þetta er án vafa allra besta opnun sem þessi á hefur átt og sýnir hversu gott starf Lax-Á hefur unnið við ánna en með aukinni veiði hefur ásókn í veiðileyfi aukist mikið og það er nokkuð ljóst að með þessari opnun á hún bara eftir að aukast.  Við höfum að auki fréttir af 104 sm laxi sem var tekinn á land þar í gær og bíðum eftir frekari fregnum og myndum af þeirri viðureign.