Leiðin til Rússlands er ennþá greið

Eftir fimm leiki án sigurs og 426 mínútur og tæp 12 ár án marks unnu Íslendingar loks sigur á Króötum á Laugardalsvelli í gær.

Allt stefndi í markalaust jafntefli en íslensku strákarnir fundu aukakraft til að vinna leikinn. Þegar mínúta var til leiksloka átti Birkir Már Sævarsson frábæra fyrirgjöf frá hægri, beint á kollinn á Jóhanni Berg Guðmundssyni sem skallaði beint á Lovre Kalinic í marki Króatíu.

Íslendingar fengu horn og það tók Gylfi Þór Sigurðsson. Eins og svo oft áður var spyrna Swansea-mannsins frábær, beint á Hörð Björgvin Magnússon sem fékk frían skalla og setti boltann í boga yfir Kalinic. Ótrúlega mikilvægt mark hjá Herði Björgvini og það þýðir að Ísland er jafnt Króatíu á toppi riðilsins þegar fjórar umferðir eru eftir. HM-draumurinn lifir því góðu lífi og möguleikinn á að ná efsta sætinu er góður.

„Ég er hrikalega stoltur af öllum strákunum. Þetta var hrikalega sterkur liðsheildarsigur,“ sagði landsliðsþjálfarinn Heimir Hallgrímsson í samtali við Fréttablaðið eftir leik.

Lærðu af fyrri leikjunum

Eyjamaðurinn kom talsvert á óvart með liðsuppstillingu sinni í gær. Hörður Björgvin kom inn fyrir Ara Frey Skúlason í stöðu vinstri bakvarðar, Emil Hallfreðsson lék á miðjunni við hlið Arons Einars Gunnarssonar og fyrir framan þá var Gylfi Þór.

„Við breyttum um leikaðferð til að jafna þá á miðjunni og Emil, Gylfi og Aron Einar gerðu a.m.k. jafn vel og þeir og í flestum tilfellum betur. Það var lykillinn að góðri spilamennsku í dag, hversu vel við spiluðum inni á miðjunni og lokuðum á þá og komum í veg fyrir að þeir sköpuðu sér færi,“ sagði Heimir sem segist hafa lært af fyrri viðureignum gegn Króatíu.

„Við reyndum að læra af leikjunum okkar við Króatíu. Mér fannst við taka stórt skref fram á við í Zagreb. Við fundum að við gátum pressað þá. Það eru ekki mörg lið sem pressa Króatíu og kannski er það ástæðan fyrir því að þeir fá á sig fá mörk. Þetta kom þeim örugglega á óvart.“

Leikáætlun Heimis gekk fullkomlega upp. Það eru fá lið í heiminum betri að halda boltanum en Króatar en Íslendingar komu í veg fyrir að þeir næðu sínum dáleiðandi samleiksköflum með frábærri pressu. Fyrirliðinn Aron Einar Gunnarsson fór þar fremstur í flokki en hann braut niður hverja sókn Króatíu á fætur annarri og gaf tóninn.

Uppreisn æru

Hetja íslenska liðsins í gær, Hörður Björgvin, átti erfitt uppdráttar í tapinu í Zagreb í fyrra en hann svaraði fyrir sig í gær og fékk hrós frá landsliðsþjálfaranum eftir leik.

„Við vitum að hann er ekki bakvörður að upplagi en hann hefur vaxið í þessu hlutverki. Við þurftum hæð í varnarlínuna og ég held að það hafi sýnt sig í leiknum að þetta var rétt ákvörðun,“ sagði Heimir um manninn sem skoraði markið sem færði Íslendinga nær takmarkinu; að komast á HM í fyrsta sinn.