Formaðurinn segir stöðu KR óásættanlega en Willum heldur starfinu

Willum Þór Þórsson, þjálfari KR, á ekki von á uppsagnarbréfi frá knattspyrnudeild félagsins þrátt fyrir dapran árangur í fyrstu sjö umferðum Pepsi-deildarinnar. Liðið tapaði í gær, 3-1, fyrir ÍBV á útivelli.

Þetta kemur fram í viðtali við Kristinn Kjærnested, formann knattspyrnudeildar KR, á 433.is þar sem hann er spurður út í stöðu þjálfarans eftir þessa skelfilegu byrjun.

Willum kom eins og stormsveipur aftur inn í Pepsi-deildina á síðustu leiktíð og reif KR úr kjallaranum alla leið upp í Evrópusæti. Nú er liðið með sjö stig í tíunda sæti eftir sjö umferðir, tveimur stigum minna en á sama tíma í fyrra.

„Staða Willums er örugg. Við vonum að hann og leikmennirnir fyrst fremst fari að snúa þessu við. Staðan er óásættanleg eins og hún er í dag,“ segir Kristinn við 433.is.

KR mætir næst Breiðabliki í stórleik í 8. umferð Pepsi-deildarinnar á mánudaginn en verður Willum í vandræðum ef KR tapar þar? „Betur má ef duga skal. Látum það vera lokaorð,“ segir Kristinn Kjærnested.

Bjarni Guðjónsson var rekinn sem þjálfari KR í fyrra í níundu umferð en hann var þá búinn að tapa þremur leikjum í röð. Willum er með færri stig en Bjarni á sama tíma í fyrra og er búinn að tapa tveimur leikjum í röð.