Viðar Örn ekki í landsliðshópnum: Ég legg ekki árar í bát

Viðar Örn Kjartansson, framherji Maccabi Tel Aviv í Ísrael, er ekki í íslenska landsliðshópnum sem mætir Króatíu í undankeppni HM 2018 sunnudaginn 11. júní en um toppslag í I-riðli undankeppninnar er að ræða.

Viðar Örn, sem hefur raðað inn mörkum fyrir félagslið sín undanfarin ár, hefur verið fastamaður í landsliðshópnum en mikið fjaðrafok var í kringum valið á honum síðast eftir að upp komst að hann mætti ölvaður til móts við landsliðið síðast þegar það spilaði við Króatíu.

Selfyssingurinn var í byrjunarliði Íslands sem vann Kósóvó í undankeppninni í mars en nú verður hann fjarri góðu gamni. Hópurinn verður tilkynntur klukkan 13.15 og verður Vísir með beina útsendingu úr Laugardalnum.

„Ég var auðvitað rosalega svekktur þegar að ég heyrði þetta en ég verð að taka þessu eins og maður vonast til að fá kallið næst. Kannski stóðu menn sig bara betur en ég í síðasta verkefni. Ég verð að viðurkenna að ég hef ekki alltaf nýtt tækifærið mitt nógu vel og kannski voru aðrir leikmenn betri,“ segir Viðar Örn í samtali við Vísi.

„Ég virði ákvörðun þjálfaranna. Ef þeim finnst aðrir leikmenn hafa staðið sig betur í síðustu verkefnum þá verð ég að taka því. Ég hef verið að skora mikið með félagsliðum mínum en landsliðið snýst ekki bara um það.“

Það er ekkert grín að brjótast inn í byrjunarlið íslenska liðsins sem lítið breyst undanfarin ár. Viðar hefur fengið tækifæri í vináttuleikjum og ekki skorað í sex síðustu landsleikjum sem hann hefur spilað.

„Sumir smella bara inn í þetta strax og þeir spila fyrsta leik en ég gerði það ekki. Ég kom inn í liðið þegar allir þessir strákar voru að spila sinn besta fótbolta og liðið vann alla leiki. Það er erfitt að komast inn í þetta lið því það er svo gott,“ segir Viðar Örn.

„Ég hef fengið sénsa en þeir hafa kannski verið svolítið stuttir. Landsliðið finnst mér stundum vera svolítið spretthlaup en ég verð að taka það á mig að ég hef ekki alltaf nýtt tækifærin til fullnustu. Ég verð að yfirfæra það sem ég er að gera með félagsliðinu mínu í landsliðið þar sem maður þarf að spila vel á stuttum tíma.“

Viðar viðurkennir að hann sé sár en þó ekki bitur enda segist hann hafa skilning á ákvörðun Heimis og Helga. Hann vonast til að strákarnir leggi Króata að velli í þessum mikilvæga leik og ætlar sér að koma inn í hópinn síðar.

„Ég legg ekki árar í bát. Það er alveg klárt. Ég tek því bara að hafa ekki verið valinn núna. Ég var á EM og hef verið í flestum landsliðshópunum undanfarin ár en ég verð bara að taka þessu þannig að ég þurfi að gera betur. Ég get ekki farið í neinar skotgrafir með þetta. Ég tek þessu bara eins og maður og reyni að standa mig betur. Ég vona bara svo sannarlega að strákarnir vinni þennan leik,“ segir Viðarn Örn Kjartansson.