Keflvíkingar komnir á sigurbraut á ný

Eftir rýra uppskeru í síðustu leikjum vann Keflavík góðan 3-0 sigur á Haukum í 6. umferð Inkasso-deildarinnar í kvöld.

Þetta var aðeins annar sigur Keflvíkinga í sumar og sá fyrsti síðan í 2. umferð.

Keflavík komst yfir þremur mínútum fyrir hálfleik þegar Frans Elvarsson skoraði með laglegu skoti.

Á 52. mínútu jók Ísak Óli Ólafsson muninn í 2-0 með skalla eftir aukaspyrnu Jurajs Grizelj. Það var svo Marko Nikolic sem negldi síðasta naglann í kistu Hauka á 79. mínútu. Lokatölur 3-0, Keflavík í vil.

Keflvíkingar eru í 5. sæti deildarinnar með níu stig, fjórum stigum á eftir toppliði Fylkis.

Haukar, sem hafa ekki unnið í fimm leikjum í röð, eru í 7. sætinu með sex stig.

Upplýsingar um úrslit og markaskorara eru fengnar frá Fótbolta.net.