Spánverjar enn ósigraðir undir stjórn nýja þjálfarans

Álvaro Morata sá til þess að Spánverjar eru enn ósigraðir undir stjórn Julen Lopetegui þegar hann jafnaði metin í 2-2 þremur mínútum fyrir leikslok í vináttulandsleik gegn Kólumbíumönnum í kvöld.

Spánn hefur leikið níu leiki síðan Lopetegui tók við liðinu eftir EM 2016; unnið sex og gert þrjú jafntefli.

David Silva kom Spánverjum yfir á 22. mínútu en Edwin Cardona jafnaði metin fimm mínútum fyrir hálfleik.

Falcao kom Kólumbíumönnum yfir á 55. mínútu og allt stefndi í kólumbískan sigur þangað til Morata jafnaði metin á 87. mínútu með skalla eftir fyrirgjöf Saúl Níguez.

Framundan hjá Spánverjum er leikur gegn Makedóníumönnum í undankeppni HM 2018 á sunnudaginn.