Frábær opnun í Laxá í Mývatnssveit

Laxá í Mývatnssveit er án efa eitt besta urriðasvæði í heiminum og þeir sem einu sinni veiða þetta skemmtilega svæði mæta þangað á hverju sumri eftir það.

Veiðin hófst í gærmorgun og það er óhætt að segja að veiðin hafi farið vel af stað en fyrstu tölur af bökkum Laxár voru 140 fiskar á fyrstu morgunvakt og það er mikið líf á svæðinu.  Fiskurinn er afskaplega vel haldinn og kemur vel undan vetri bústinn og flottur.  Veiðin hefur að sögn veiðimanna á svæðinu dreifst vel á alla veiðistaði og veiðin nokkuð jöfn á milli manna en hæsta talan sem við fréttum af á fyrstu vakt voru 20 fiskar á eina stöng.

Á vefsölu SVFR má sjá að það er ennþá hægt að ná sér í daga í Laxá og það má reikna með því að þegar fréttir af svona góðum aflabrögðum fara á stjá að það verði margir sem hugsa sér gott til glóðarinnar.